Avioni i presidentit ukrainas, Volodymyr Zelensky ateroi në aeroportin e Rinasit në orën 23:00 të mbrëmjes së kësaj të marte.
Presidenti i Ukrainës u prit nga ministri i Jashtëm, Igli Hasani dhe ministrja Elisa Spiropali.
Tirana do të jetë kryeqendra e diplomacisë evropiane për dy ditë me radhë, ku do të zhvillohet samiti i Ukrainës dhe ai i liderëve të Ballkanit Perëndimor.
Takimin e parë, Zelensky do ta ketë me kryeministrin shqiptar Edi Rama.
Kjo është vizita e parë e presidentit Zelensky në Shqipëri.
Për mbarëvajtjen e dy samiteve, policia ka ndërmarrë një plan të detajuar masash. Për arsye sigurie duke filluar që nga mbrëmja e kësaj të marte, do të ketë bllokim të rrugësh, ndërsa rreth 1500 forca policie do të angazhohen në terren.
Para mbërritjes në Tiranë Presidenti i Ukrainës, Volodymyr Zelensky realizoi një vizitë të paparalajmëruar në Arabinë Saudite. Zelensky ka diskutuar me princin e kurorës Mohammed bin Salman një plan paqeje si dhe kthimin e të burgosurve të luftës nga Rusia.
