Presidenti i Kosovës, Hashim Thaçi ka reaguar pas dënimit që FIFA ua shqiptoi reprezentuesve zviceran me prejardhje shqiptare, Granit Xhakës dhe Xherdan Shaqirit.
Gjatë ditës së hënë, FIFA konfirmoi se ka dënuar dyshen shqiptare, Xhaka dhe Shaqiri pas festimeve të tyre në ndeshjen e Zvicrës ndaj Serbisë.
FIFA gjobiti dyshen shqiptare me nga 10 mijë franga, ndërsa kapitenin Stefan Lichtsteiner u dënua me pesë mijë franga.
Pas këtij dënimit, Presidenti i Kosovës Thaçi, të hënën mbrojti dy futbollistët me prejardhje nga Kosova, duke thënë se simboli që ata bënë nuk ka vra asnjë njëri.
Sipas Thaçit, festimi i Xhakës dhe Shaqirit duhet të shihet si emocional dhe jo politik, ashtu sikurse u pa nga serbët.
“Ky simbol nuk është simbol që vrau njerëzit. Nuk është simbol i një sulmi ndaj askujt. Është një simbol i një shpendi. Kështu që Zvicra mund të fluturojë drejt suksesit “, u tha Thaçi gazetarëve në Bruksel të hënën.
Këto deklarata të presidentit të Kosovës erdhën një ditë pasi takoi presidentin serb Aleksandar Vuçiç si pjesë e një dialogu të mbështetur nga BE që synonte normalizimin e marrëdhënieve ndërmjet dy palëve.
Ndryshe, ndeshja mes këtyre dy kombëtareve përfundoi me fitoren 2-1 të helvetikëve, pikërisht falë golave të Xhakës dhe Shaqirit. /Telegrafi/