Kryesuesi i Bordit të Drejtorëve të Postës së Kosovës, Halit Isufi, ka kërkuar nga Qeveria e Kosovës ta ndihmojë këtë kompani që të funksionojë ngjashëm me kompanitë simotra në vendet e rajonit.
Isufi në këtë intervistë për gazetën “Epoka e re” është shprehur se Posta e Kosovës dhe punëtorët e saj nuk kërkojnë lëmoshë, por punë nga ana e Qeverisë së Kosovës, pasi një mundësi e tillë ekziston. “Ne po kërkojmë që disa shërbime të subvencionohen nga ana e institucioneve të Kosovës, pasi nuk mund të kemi rezultate të mirëfillta nëse ne vazhdojmë që për një pliko prej 50-centësh t’i humbim 20 euro. Kjo po ndodh tani, sepse ne po punojmë për qytetarët e vendit. Ne një pliko po e dërgojmë me një pagesë solide deri në cepin më të largët të Kosovës”, ka thënë ai.
Isufi është shprehur se shumë çështje janë të trashëguara nga e kaluara, kur Posta e Kosovës ishte nën një ombrellë me VALA-n dhe Telekomin, të cilat sot po afarojnë më mirë se Posta e Kosovës.
“Ne deri më tani i kemi ulur dy herë pagat, përfshirë edhe të kryeshefit ekzekutiv. Ne mendojmë se ai e ka një pagë që duke llogaritur sa ka punë ai, është e vogël. Ne i falënderojmë të gjithë punonjësit e Postës së Kosovës, të cilët kanë pranuar që të marrin paga më të ulëta”, ka theksuar ai. I pari i Bordit të Postës së Kosovës ka vlerësuar se nëse Qeveria e Kosovës, konkretisht Ministria e Punës dhe Mirëqenies Sociale, merr vendim që Posta t’i shpërndajë të ardhurat sociale, kjo kompani do t’i arkëtojë rreth 400 mijë euro. /Telegrafi/