Me qëllim të parandalimit të aksidenteve në komunikacion, Policia Rrugore e Tiranës po vazhdon kontrollet e automjeteve dhe shoferëve të tyre.
Në autostradën Durrës-Tiranë, të shtunën në mbrëmje, radari i Policisë ka kapur një veturë të drejtuar nga shtetasja L.D., e cila lëvizte me shpejtësi 163 km/h, në kushte të lagështirës në rrugë si pasojë e motit të keq.
“Qëllimi jonë s’është as pezullimi i lejes së drejtimit, as sasia e masave administrative, por vetëm e vetëm siguria e jetës në rrugë“, thekson Policia e Shtetit në një njoftim në “Facebook”.
Parandalimi i aksidenteve rrugore ka mobilizuar 24/24 h Policinë Rrugore të Tiranës.
Në këtë njoftim, Policia thekson se reklamimi i shkeljeve të ndryshme të Kodit Rrugor ka një qëllim të vetëm: Sensibilizimin e drejtuesve të mjeteve dhe të këmbësorëve për zbatim të rregullave të qarkullimit rrugor, me qëllim që të shpëtohen jetë dhe jo të ndëshkohen fajtorët pas aksidentit, si dhe as të tregojmë se po punojmë se fundja detyrën që na paguajnë taksapaguesit bëjmë, por të bëjmë prezent fenomenin për ta parandaluar atë.
