Agjencia amerikane e Sigurisë Kombëtare, i ka ofruar policisë kufitare qentë robot për të mbikëqyrur vijën kufitare me Meksikën.
Qëllimi i këtij programi është të përdoret teknologjia dhe rritet prezenca e policisë përgjatë kufirit, me qëllim që të zvogëlohet ekspozimi i njerëzve në situata të rrezikshme për jetë, transmeton Telegrafi.
“Kufirit në jug mund të jetë vend i rrezikshëm për njerëzit dhe kafshët, e pikërisht për këtë makineritë mund të ndihmojnë”, tha menaxherja e programit Brenda Long.
Ushtria amerikane gjatë vitit 2020 ka bashkëpunuar me kompaninë Ghost Robotics që prodhon qentë robot, me qëllim që të mund të patrullojnë në bazat ushtarake.
E tani kjo kompani ka bashkuar forcat me kompaninë SWORD International që merret me prodhimin e armëve, për të zhvilluar versionin e qenve robotikë të armatosur dhe të aftë të eliminojnë objektivat nga një distancë prej 1.220 metra.
Dy modele të paarmatosur tashmë janë testuar për të bërë roje, e janë të aftë të patrullojnë të pavarur në një perimetër të programuar.
Janë të pajisur me kamera dhe sensorë, e gjatë testimeve kanë kryer inspektimin e vagonëve të trenit dhe objekteve tjera – ku konsideronin se mund të ketë prani të forcave armike. /Telegrafi/
