Njësitë kundër terrorizmit të policisë kufitare izraelite kryen një bastisje pranë Jeninit në Bregun Perëndimor të premten mbrëma, duke vrarë tre palestinezë.
Shërbimi izraelit i sigurisë Shin Bet tha se anëtarët e krahut të armatosur të organizatës palestineze të Xhihadit Islamik u vranë dhe u tha se ata ishin gjithashtu përgjegjës për sulmin e mëparshëm në Tulkarm.
“Inteligjenca ka përcaktuar se ata ishin në rrugë për të kryer një tjetër sulm në shkallë të gjerë. Shin Bet i përkufizoi ato si ‘bomba me sahat'”, raporton jerusalempost.
Ministri izraelit i Sigurisë Publike, Omer Bar Lev vlerësoi punën e policisë dhe shërbimeve të sigurisë izraelite dhe theksoi se policia izraelite do të vazhdojë të luftojë terrorizmin.
“Ky është incidenti i tretë këtë javë në të cilin policia izraelite shërbeu si një zonë tampon midis terrorit dhe qytetarëve të Izraelit dhe mundi terroristët”, tha ministri.
Në funeralin e tre palestinezëve morën pjesë edhe anëtarë të Hamasit, Xhihadit Islamik të Palestinës dhe grupeve të tjera palestineze dhe njoftuan se do të hakmerreshin për sulmin e shërbimeve izraelite.
“Armiku sionist ka kryer një krim agresiv kundër tre muxhahidëve tanë heroikë në ditën e parë të muajit të shenjtë të Ramazanit. Meqenëse ne e mbajmë armikun plotësisht përgjegjës për këtë krim, konfirmojmë se gjaku i fëmijëve tanë nuk do të derdhet kot”, njoftoi Xhihadi Islamik Palestinez.
Edhe organizata Hamas foli për vrasjen dhe i cilësoi veprimet e shërbimeve izraelite si frikacake. /Telegrafi/