Dhjetëra persona janë lënduar gjatë një ahengu të organizuar në një ndërtesë gjigante në afërsi të universitetit Klemson në Karolinën e Jugut, kur u shemb dyshemeja dhe mbretëroi një situatë kaotike.
Policia amerikane ka njoftuar se 30 persona janë dërguar me urgjencë në spitalet më të afërta, kurse raportohet se gjithçka ndodhi vetëm 30 minuta pas mesnatës në katin e parë të ndërtesës që gjendet pak minuta larg kampusit të universitetit, transmeton Telegrafi.
Pjesa qendrore e dyshemesë thjesht ishte “shqyer” dhe të pranishmit në aheng kanë përfunduar në bodrum. Mediat amerikane raportojnë se studentët po festonin fillimin e vitit të ri akademik, si dhe fitoren e ekipit të tyre të futbollit.
Në videon amatore të publikuar më poshtë, shfaqet masa duke u argëtuar nën tingujt e muzikës të cilët nuk mund të ndaleshin duke vallëzuar, si dhe momenti kur shembet dyshemeja mbi të cilën po qëndronin.
“Duke u nisur jashtë ndjeva se diçka e çuditshme po ndodhte, dhe pasi ktheva kokën i pashë të gjithë duke rënë poshtë. Të gjithë po bërtisnin dhe qanin. Ishte një moment i pabesueshëm, pasi disa sekonda më herët ata ishin aty duke vallëzuar”, ka deklaruar studentja 20-vjeçe Raven Gerra.
Policia ka njoftuar se është duke hetuar rastin, ndërsa që të gjithë studentët janë nxjerrë nga “gropa” dhe se askush nuk ka mbetur i ngujuar. /Telegrafi/
