Presidenti i Shteteve të Bashkuara të Amerikës në atë kohë, Bill Clinton, u ishte drejtuar amerikanëve më 11 qershor të vitit 1999 duke thënë se për herë të parë pas 79 ditësh, qielli i Yugosllavisë është i qetë.
Siç kishte thënë presidenti Clinton, përcjell Telegrafi, “ushtria dhe policia serbe po tërhiqen nga Kosova. 1 milion burra, gra dhe fëmijë të larguar nga toka e tyre po përgatiten të kthehen në shtëpi. Kërkesat e një bashkësie të bashkuar ndërkombëtare janë përmbushur”.
“Unë mund t’i raportoj popullit amerikan se kemi arritur një fitore për një botë më të sigurt, për vlerat tona demokratike dhe për një Amerikë më të fortë. Pilotët tanë janë kthyer në bazë. Sulmet ajrore janë pezulluar. Agresioni kundër një populli të pafajshëm është ndaluar”, kishte thënë Clinton në fjalimin e tij.
Dhe si konkluzion, presidenti amerikan e kishte thënë një fjali, e cila sot është shkruar në një pllakë të vendosur në bulevardin “Bill Clinton” në Prishtinë.
And a new addition to Bill Clinton Boulevard. pic.twitter.com/sqlDB6z6BD
— Angel Ureña (@angelurena) June 12, 2019
Bëhet fjalë për fjalinë përmes së cilës presidenti Clinton kishte dhënë ndoshta mesazhin kryesor.
“Për shkak të vendosmërisë sonë, shekulli i 20-të po mbaron, jo me zemërim të padobishëm, por me një afirmim shpresëdhënës të dinjitetit njerëzor dhe të drejtave të njeriut për shekullin 21”, kishte theksuar ndër tjerash presidenti i atëhershëm i SHBA-së, Bill Clinton.
Ndryshe, gjatë ditës në Kosovë, përveç ish-presidenti amerikan, kanë qëndruar edhe ish-sekretarja, Madeline Albright, ish-gjenerali Wesley Clark, dhe personalitete të tjera nga rajoni dhe bota.
Ardhja e tyre në Kosovë përkon me shënimin e 20-vjetorit të hyrjes së forcave të NATO-s, në qershor të vitit 1999. /Telegrafi/