Shqiptarët nga Kosova, Pleurat Hajrullahu dhe Afrim Pllana, janë zgjedhur sipërmarrësit e rinj më të mirë të vitit 2020 në Suedi. Me përkushtimin e tyre kanë arritur të ngrisin suksesshëm kompaninë e tyre të reklamave Pixid AB.
Kompania Pixid AB ishte një agjenci krejtësisht e re reklamash kur filloi COVID-19. Pronarët Pleurat Hajrullahu dhe Afrim Pllana për shkak të gjendjes pandemike, me shpejtësi kishin shndërruar biznesin e tyre në një kompani prodhuese për maska plastike për kujdesin shëndetësor, një përshtatje unike me situatën aktuale me COVID-19.
Produkti i tyre është certifikuar nga CE, dhe tani përveç tregut suedez, maska unike e prodhuar nga ta, eksportohet edhe në 23 vende të tjera evropiane.
Pleurati tregon se në fillet e biznesit të tij kishte pasur mbështetje të jashtëzakonshme nga liderët e kompanisë “NyföretagarCentrum”, të cilët pa-hezituar e kishin njoftuar me komunitetin e biznesit në Suedi.
Harry Goldman, drejtori i kompanisë NyföretagarCentrum Sverige, i cili edhe ka ndarë çmimin, ka thënë se fituesit janë të gjithë shembuj të shkëlqyeshëm të ndërmarrjeve të qëndrueshme fillestare që kanë potencial të rritjes së kompanisë.
“E përbashkëta e fituesve është se përmes sipërmarrjes së tyre ata shtojnë diçka të re: një model biznesi; qëndrueshmëria sociale ose e gjelbër; industri të reja ose inovacione”, thekson Goldman.
Sipas tij, ajo që e bën fituesin e këtij viti unik është shpejtësia e tyre për të krijuar diçka në mbrojtje të coronavirusit, pavarësisht nga fakti se biznesi i sapo filluar kishte një fokus krejt tjetër.
Artikullin e plot në suedisht mund ta lexoni KËTU. /Telegrafi/
