Policia është duke hetuar rastin, pasi gjatë një emisioni që transmetohej live në një radio lokale të ftuarit si dhe prezantuesi janë plaçkitur nga persona të armatosur, ndërsa e gjithë ngjarja është transmetuar live në rrjetet sociale.
Radioja SOT në Sap Paulo të Brazilit, ishte “pushtuar” nga të paktën pesë gangsterë të armatosur që u futën brenda vetëm disa minuta para se të përfundonte emisioni, transmeton Telegrafi.
E prezantuesi mbeti i habitur kur pa njërin nga plaçkitësit me armë në dorë, duke i kërcënuar që t’ia dorëzojnë të gjitha gjësendet me vlerë. Por, plaçkitësit nuk e kishin ditur se e gjithë ngjarja po transmetohej live në Facebook.
Prezantuesi Jocimar Martins dëgjohet duke bërtitur “ju lutem qetësohuni”, derisa plaçkitësit vetëm sa vinin e bëheshin më të ashpër duke ua drejtuar armën secilit që ishte brenda studios.
Hetuesit brazilianë kanë bërë të ditur se janë duke shfrytëzuar pamjet që transmetoheshin live për të identifikuar plaçkitësit, dhe kërkojnë ndihmën e secilit qytetarë që ka ndonjë informacion që mund të ndihmojë në kapjen e tyre. /Telegrafi/
