Pilates, hit në botë dhe tek ne

Model: Albulena MALIQI
Foto: Arton HUMOLLI

Kjo teknikë ka lindur në vitet 20 dhe është përqafuar së fundmi nga Madonna dhe Liz Hurley. Pilates është një lloj gjimnastike e krijuar para 80 vitesh nga gjermani Joseph Pilates. Dhe ka qenë e vetmja teknikë e aftë për t’i ofruar trupit një stërvitje komplete. Pilates përfshin joga, luftim greko-romak, ushtrime të përdorura nga akrobatët e cirkut, lëvizje nga artet marciale, të mbledhura për të krijuar një program komplet me lëvizje të lehta dhe të kontrolluara nga Joseph Pilates, i cili i vuri emrin e tij. Ai e çoi pastaj teknikën e tij në New York, ku do të përdorej nga balerinët, për të mbajtur forcën e muskujve, ekuilibrin, fleksibilitetin dhe koordinatat pa u lodhur shumë. Koncepti çelës i Pilates është se lëvizjet fillojnë nga pjesët më të thella të muskujve për të konkluduar në sipërfaqe.

1. Duart e shtrira krejtësisht prapa vetes, vendosni mbi top. Të gjithë trupin tërhiqeni duke i çuar ijët sa më lartë që mundeni, në këtë mënyrë bëni disa ‘pompa’ të pasme mbi top.
Ky ushtrim është i mirë për: baraspeshën, tricepsët dhe zgjatjen e muskujve të gjoksit.
– Përkuluni mbi top me duart e shtrira, pastaj provoni ta mbani baraspeshën. Ky ushtrim është pikërisht për zhvillimin e baraspeshës.

2. Përkuluni mbi topin e madh, duke u zgjatur përpara sikur dëshironi të bëni një ‘pompë’ të gjerë. Çohuni lartë-poshtë. Keni kujdes që kërthiza juaj të jetë sa më e tërhequr brenda, ndërsa shpina të jetë në pozitë të drejtë.
Ky ushtrim është i mirë për: muskujt e barkut dhe të gjoksit.

3. Shtrijuni me shpinë mbi topin e madh, ndërsa këmbët mbani në dysheme në kënd prej 90 shkallëve. Zgjeroni duart, dhe në secilën prej tyre mbani nga një top me peshë. Provoni t’i bashkoni duart me pesha përpara jush, duke u ngritur me trupin lartë.
Ky ushtrim është i mirë për: muskujt e gjoksit dhe të barkut.

4. ‘Kalërojeni’ topin. Pjesën e sipërme të trupit përkuleni përpara me duart e zgjatura pas koke. Shtypeni topin me gjunjë.
Ky ushtrim është i mirë për: muskujt e shpinës dhe të këmbëve.

5. Përkuluni në dysheme me duart pas koke, me shuplakat e lidhura. Vendoseni shpinën mbi top, dhe sa më shumë që mundeni zgjatni bërrylat nga parapa dhe provoni ta çoni shpinën nga topi.
Ky ushtrim është i mirë për: të gjithë muskujt e pjesës së përparme të trupit.

 

/Telegrafi/