Phil Jones refuzoi të heqë dorë nga numri 4 për Raphael Varanen

Raphael Varane ka marrë fanellën me numër 19 te Manchester Unitedi pasi anglezi Phil Jones refuzoi të heqë dorë nga numri 4 i tij.

Varane, 28 vjeç, u prezantua si lojtar i ri i Unitedit para tifozëve në Old Trafford të shtunën, ku Djajtë e Kuq fituan thellë 5-1 kundër Leeds United.

Ai ka nënshkruar një marrëveshje katërvjeçare me Djajtë e Kuq dhe bashkohet për një tarifë prej rreth 42 milionë funtesh apo 50 milionë eurosh.

Lexo po ashtu Fjalët e para të Varanes si lojtar i ri i Manchester Unitedit

Megjithatë, jo gjithçka ka shkuar mirë për Varanen, pasi francezi nuk ka arritur ta marrë fanellën me numrin e tij të preferuar.

Sipas mediumit Evening News Manchester, Varane ka kërkuar numrin 4 në fanellë, por Jones ka refuzuar që t’ia japë pavarësisht se nuk luan për Unitedin që nga janari i vitit 2020.

Jones aktualisht po punon për t’u rikthyer në formën e plotë në United, me Ole Gunnar Solskjaer që ka deklaruar se anglezi do të jetë zgjedhja e pestë në qendër të mbrojtjes.

Ai ka edhe dy vjet të mbetur në kontratën e tij, por një largim i mëhershëm nuk përjashtohet.

Në anën tjetër, numri 19 i Varanes ishte mbajtur nga talenti Amad Diallo në gjysmën e dytë të sezonit të kaluar, por sulmuesit anësor tani i është dhënë numri 16 dhe pritet të huazohet këtë sezon. /Telegrafi/