Shefi i misionit të vëzhguesve të BE-së, Ajolz Peterle ka mbajtur një konferencë për media lidhur me mbarëvajtjen e procesit zgjedhor të 19 nëntorit.
Peterle me këtë rast tha se zgjedhjet u organizuan përgjithësisht në një frymë të qetë, të rregullt dhe me një konkurrencë të fortë.
“Këto zgjedhje ishin me konkurrence të fortë. Shumica e komunave më të mëdha votuan në raundin e dytë të zgjedhjeve. Aktivitetet e fushatës u organizuan kryesisht në frymë të qetë dhe përgjithësisht u përmbajtën nga përdorimi i gjuhës nxitëse”, tha Peterle.
Shefi i misionit të vëzhguesve të BE-së tha se kanë vënë re ngritje të tensioneve në disa komuna ku garuesit akuzuan njëri-tjetrin për taktika të padrejta dhe presion të paligjshëm mbi votuesit, si në Gjakovë dhe Mitrovicën Jugore.
Ai po ashtu tha se edhe në komunat si Kllokot e Partesh, atmosfera ishte pak e polarizuar, por pa pasur incidente të mëdha.
Peterle tha se vëzhguesit e tyre vizituan 292 vendvotime në ditën e zgjedhjeve dhe përgjithësisht panë një transparencë të mirë të procesit.
Sipas tij, hapja dhe votimi në qendrat e votimit u vlerësua pozitivisht, ndërsa numërimi u zhvillua kryesisht në mënyrë transparente dhe efikase.
Peterle më tej shtoi se duhet të përmirësohen disa aspekte të votimit dhe numërimit. Sipas tij, të kuptuarit e votimit vazhdon të jenë fushë ku kërkohen përmirësime.
Ai tha se edhe qasja në objektet e vendvotimeve për personat me aftësi të kufizuara vazhdon të jetë e vështirë.
Peterle më tej tha se pesë gara janë në margjina të ngushta, si në Prishtinë, Prizren, Kllokot, Rahovec, dhe Dragash dhe sipas tij, numërimi i votave me kusht dhe postë mund të përcaktojnë rezultatin përfundimtar.
Ai tha se misioni i BE-së për vëzhgimin e zgjedhjeve do të qëndrojë në Kosovë deri në shpalljen e rezultateve përfundimtare.
“Duhet të theksojmë qartazi se vlerësimet do të kenë kuptim vetëm nëse gjetjet dhe rekomandimet tona merren parasysh”, u shpreh Peterle.
Ai në fund tha “Shpresoj se nuk do të ftohem së shpejti të bëhem kryesues i misionit vëzhgues të zgjedhjeve në Kosovë”. /Telegrafi/