David Pugh është përleshur me pesë plaçkitës, që kishin hyrë në shtëpinë e tij që ndodhet në West Midlands.
Pronari 55-vjeçar ishte duke fjetur, kur dëgjoi britmën e djalit të tij adoleshent dhe të lehurat e qenit, andaj u ngrit me shpejtësi nga shtrati, transmeton Telegrafi.
Megjithëse duarthatë, ia doli t’i zmbrapse hajnat e maskuar, që kishin me vete thika të gjata, shkopinjtë bejsbolli dhe golfi.
Pamjet shqetësuese e tregojnë Pugh, që mbeti me hundë të thyer, si dhe disa lëndime në fytyrë, si pasojë e rezistencës për të mbrojtur pronën që vlen rreth gjysmë milioni euro.
“Kërkonin para dhe më qëllonin gjatë tërë kohës, ndërsa unë vetëmbrohesha. Pastaj nisa t’i vë në funksion aftësitë e arteve marciale, që i kam mësuar si i ri”, ka thënë Pugh.
Policia ka deklaruar se kjo është një ndër thyerjet më të dhunshme në prona, ndërsa janë duke bërë hetime për të rënë në gjurmë të keqbërësve. /Telegrafi/
