Pesë persona përfshirë dhe një grua shtatzënë u vranë dielën pas të shtënave në anën verilindore të Indianapolis – duke u cilësuar kështu nga autoritetet si një “vrasje masive”.
Sipas CNN, përcjell Telegrafi, një i ri ishte gjithashtu në gjendje kritike pasi u qëllua në këtë incident, derisa vlerësohen të jenë “të shtënat më të mëdha fatale në Indianapolis në më shumë se një dekadë”, sipas Shefit të Policisë Metropolitane (IMPD), Randal Taylor.
Oficerët e policisë të IMPD-s iu përgjigjën një raporti të një personi të qëlluar pak para orës 4 të mëngjesit.
Pas mbërritjes, policia u ndesh me një mashkull të mitur me plagë të dukshme me armë zjarri”, iu tha medieve zëdhënësi i IMPD-s, Shane Foley.
Zyrtarët më pas morën një informacion që i çoi në një banesë tjetër më pak se një bllok larg, ku gjetën pesë persona të vdekur – përfshirë një grua shtatzënë – me plagë të dukshme me armë zjarri, tha ai.
“Pavarësisht nga përpjekjet më të mira nga stafi mjekësor, gruaja ashtu edhe fëmija i palindur nuk mbijetuan”, shtoi Foley.
“I riu që u qëllua pritet t’i mbijetojë plagëve”, deklaroi zëdhënësi.
Derisa hetimi i autoriteteve është në fazat e hershme, Foley tha se të shtënat e shumta “nuk duket të jenë veprim i rastësishëm”. /Telegrafi/