Sipas statistikave të zyrës për informim të KEK-ut, për nga shpenzimi i energjisë prijnë minierat, pastaj termocentralet e kështu me radhë. “Minierat harxhojnë prej 20-30 megavatë orë energji elektrike, TC ‘Kosova A’ prej 12-14 megavat, TC ‘Kosova B’ diku 25 megavat si shpenzime vetanake, këto nuk e zvogëlojnë prodhimin në prag, të tjera nëpër zyrat e KEK-ut, diku përafërsisht 5 megavat”, tha zëdhënësi i KEK-ut, Viktor Buzhala.
Por, sasia e energjisë së shpenzuar nga KEK-u varet edhe nga sasia e prodhuar e energjisë elektrike nëpër blloqe.
“Nëse prodhohen 560 megavat për orë shpenzimi është 30 megavat, nëse ne i prodhojmë 720 Megavate atëherë shpenzimi është 32 megavat”, tregon Buzhala, për Telegraf.
Nga totali i energjisë së prodhuar në blloqet e KEK-ut, kjo e fundit për nevoja të veta shfrytëzon rreth 4 deri në 5 për qind.
Një bllok i TC “Kosova A” dhe dy blloqet e TC “Kosova B” në total prodhojnë prej 555 deri në 680 megavat orë energji elektrike. /Telegrafi/