Ju detyrohemi të gjithë lojtarëve tanë, i detyrohemi Fatos Beqirajt, i detyrohemi tifozëve dhe kësaj radhe edhe mediave.
Pse ju detyrohemi lojtarëve?
Sjellja e tyre përbrenda të gjitha normave fair-play, ishte skajshmërisht e bukur. Nuk kishin asnjë moment të gjaknxehtësisë; kishin qetësinë dhe sjelljen sportive në nivelin më të lartë.
Pse i detyrohemi Fatos Beqirajt?
Malazezët janë në luftë të tmerrshme me pjesën serbe brenda republikës së tyre. Kjo u reflektua në braktisjen e Kombëtares së tyre, nga serbët. Kjo prodhoi çarje më të madhe brenda dy etnive në fjalë. Fatos Beqiraj qëndroi besnik; bëri lojën e tij; udhëhoqi ekipin – edhe pse emocionalisht ishte i ngarkuar. Sjellja e tij, marrë për bazë ‘pabesinë’ serbe ndaj Kombëtares malazeze, afron malazezet më shumë me etninë e parë të tyre – shqiptarët! Beqiraj është një sinjal i vogël për malazezet që shqiptaret mund të jenë më të afërt me ta, sesa serbët të cilët i kanë manipuluar historikisht për përfitime politike.
Pse ju detyrohemi tifozëve?
Ishin fantastikë, në çdo aspekt. Në rrjetet sociale, në çdo paraqitje, nuk i trajtuan malazezët si serbë; nuk e nisën gjuhën e urrejtjes; treguan edukatë. Nuk ishin në stadium, por në asnjë rast nuk u vërsulen me inat në forumet apo portalet malazeze – pavarësisht që shumë nga ne e njohim gjuhën e tyre. Nëse duam që malazezët akademikë e studiues – të cilët kanë filluar të shkruajnë se janë me origjine ilire ose shqiptaro-vllahe – t’i kemi aleatë e t’i lidhim me idenë e prejardhjes së përbashkët, atëherë duhet t’i presim me respektin maksimal në Prishtinë. Ata u braktisën nga elementi serb në Podgoricë, për shkak të Kosovës. Kosova duhet ti trajtojë me respekt në lojën e kthimit.
Pse ju detyrohemi mediave?
Orientuan drejt, çdo gjë. Nuk dhanë pezëm e as mllef para ndeshjes. Mediat i trajtuan malazezët si popull në vete; i trajtuan si popull që nuk duhet gjykuar keq. Shkruan për futbollin dhe, kur ndodhi thyerja e tyre, e cilësuan si përparësi për ne e jo ta kthejnë në banalitet politik.
Këto janë arsyet pse fituam në Podgoricë. Treguam kulturë, në çdo aspekt. Ta tregojmë këtë edhe në ndeshjen e kthimit. Sepse, luajnë shqiptarët kundër shqiptarëve të tjetërsuar, por që çdo ditë e më shumë po e pranojnë origjinën e tyre.