Infektimi i personelit shëndetësorë të Repartit të Dializës në Spitalin e Prizrenit ka ndikuar që 25 pacientë nga Kukësi që trajtohen me hemodializë në këtë spital të mos marrin shërbimin.
Në shenjë proteste, pacientët u mblodhën këtë të premte para spitalit të Kukësit ndërsa kërkuan zgjidhje për problemin e tyre, njofton Vizion Plus.
“Kërkojmë zgjidhje nga Ministria e Shëndetësisë sepse neve shpirtin na mban dializa. Kemi bërë dializë të mërkurën, por sot në Prizren nuk na pranuan pasi personeli shëndetësorë i atij reparti është infektuar”, deklaroi një paciente.
U desh ndërhyrja e Ministrisë së Shëndetësisë së Shqipërisë e cila pas negociatave me ministrinë e Shëndetësisë në Kosovë, arritën një marrëveshje për mos ndërprerjen e shërbimit të hemodializës.
Prej disa vitesh, 25 paciente nga Kukësi, Hasi e Tropoja kryejnë shërbimin e hemodializës në spitalin e Prizrenit dhe atë të Gjakovës falë marrëveshjes ndërqeveritare mes dy vendeve.