Vrasësit të John Lennon, Mark David Chapman, i është refuzuar për të nëntën herë apeli për lirim nga burgu – kanë bërë të ditur autoritetet e burgut të shtetit të New Yorkut.
“Mund të konfirmoj se kërkesa është refuzuar”, ka thënë një zëdhënëse e kontaktuar nga mediat.
Ajo shtoi se nuk zotëronte detaje të mëtejshme rreth vendimit të komisionit të lirimeve me kusht, transmeton KP, ndërsa thuhet se ai ka të drejtë të apelojë sërish pas dy vitesh.
Chapman u dënua në vitin 1981 me 20 vite deri në burg të përjetshëm. Ai ka pasur të drejtë ta kërkojë lirinë nga viti 2000, por që atëherë ai po kërkon pa asnjë rezultat çdo dy vjet për lirimin nga burgu.
61-vjeçari vrau John Lennonin në hyrje të një ndërtese në New York më 8 dhjetor 1980. Ai qëlloi pesë herë në drejtim të legjendës së “The Beatles”, ndërsa ky i fundit po kthehej në shtëpi së bashku me bashkëshorten e tij, Yoko Ono, rreth orës 22:50 në Dakota, pranë Central Park.
