Të paktën dy persona janë vrarë dhe 29 janë plagosur në një përplasje treni në Egjipt, ka njoftuar Ministria e Shëndetësisë së vendit.
Bëhet e ditur se 30 ambulanca dhe ekipe mjekësore përforcuese janë dërguar në vendin e përplasjes në qytetin e Zagazig, kryeqyteti i provincës Al Sharkia.
Të plagosurit janë transferuar në spitalet e Universitetit Al-Ahrar dhe Zagazig në qytet dhe “operacionet e shpëtimit janë ende në vazhdim”.
Imazhet nga vendi i ngjarjes treguan turma njerëzish të mbledhur rreth rrënojave të trenave ndërsa po zhvilloheshin operacionet e shpëtimit.
Siç raportohet, ka pasur një aksident vdekjeprurës në sistemin e vjetër hekurudhor të Egjiptit pothuajse çdo vit për 20 vitet e fundit, shkruan CNN, përcjell Telegrafi.
Egjipti regjistroi 2,044 aksidente treni në vitin 2018 dhe 1,793 një vit më parë, sipas Agjencisë Qendrore për Mobilizimin Publik dhe Statistikat (CAPMAS).
Në vitin 2021, të paktën 32 njerëz u vranë dhe 165 u plagosën kur dy trena u përplasën.
Në vitin 2019, të paktën 25 njerëz u vranë dhe dhjetëra u plagosën në një zjarr në stacionin Ramses në Kajron qendrore, më i ngarkuari i vendit, pasi një tren u përplas me platformën, duke shkaktuar shpërthimin e rezervuarit të karburantit.
Një përplasje mes dy trenave në Aleksandri, qyteti i dytë më i madh i Egjiptit, në gusht të vitit 2017 la më shumë se 40 të vdekur dhe shumë të tjerë të plagosur.
Në vitin 2012, 44 fëmijë vdiqën pasi një tren u përplas me një autobus shkollor në provincën Asyut të Egjiptit.
Por, aksidenti më vdekjeprurës në historinë hekurudhore egjiptiane ndodhi në vitin 2002, kur një zjarr në një tren pasagjerësh që udhëtonte në jug nga Kajro në Luxor vrau më shumë se 360 njerëz. /Telegrafi/