Lëvizja Besa përmes një kumtese për media thekson se sot këshilltari i BDI-së ka sulmuar fizikisht këshilltarin e tyre në Komunën e Ohrit, Xhemal Mena.
Lëvizja Besa thekson se rasti është paraqitur në polici dhe do të njoftojnë edhe ambasadat e huaja, përcjell Telegrafi Maqedoni.
“Lëvizja Besa dënon ashpër sulmin fizik ndaj këshilltarit tonë, i cili po lufton dhe mbron të drejtat e shqiptarëve të Ohrit dhe u sulmua pikërisht gjatë seancës të Këshillit Komunal në Ohër. Ju bëjmë thirrje gjithë organeve kompetente të marrin seriozisht sulmin ndaj një zyrtari partiak dhe përfaqësues i qytetarëve te Ohrit”, thuhet në njoftimin e Lëvizjes Besa.
Ata ju bëjnë thirrje partive tjera politike që të dënojnë këtë rast.
“Frika dhe paniku në BDI shihen qartë se veprimeve të tyre kriminogjen le po i afrohet fundi. Sot pas arrestimit të sekretarit shtetëror nga radhët e BDI si dhe publikimi i bombave për krerët e kësaj partie, ditëve të fundit, ua ka humbur orientimin, duke e parë sesa i kriminalizuar dhe i korruptuar është ky subjekt politik”, thonë nga Lëvizja Besa.
Ndërsa nga partia shqiptare në pushtet BDI, akoma nuk kanë reaguar për këto akuza dhe nuk e kanë konfirmuar rastin./Telegrafi/