Banorët e ishullit japonez të Hokkaidos në mëngjes herët u zgjuan nga sirenat dhe mesazhet e alarmeve për shkarkimin e raketës balistike të Koresë së Veriut mbi atë ishull.
Sipas mediave të huaja, përcjell Telegrafi, në Hokkaido, njerëzit në panik nuk ishin të sigurt se si të reagonin ose sa kohë kishin që të mund të iknin.
Disa thonë se u larguan nga shtëpia dhe disa qëndruan duke pritur për atë që do të ndodhte.
“Edhe nëse do të më urdhëronin të evakuohem, nuk do të dija ku të shkoja. Isha e humbur dhe e hutuar”, ka thënë njëra nga banorët.
Një tjetër ka shpjeguar se ajo nuk u largua sepse, siç tha ajo, “(bombës nuk mund t’i shpëtosh, dhe është më e tmerrshme se çdo gjë”.
E në pritje të fatit, shumë veta ndiheshin të pafuqishëm.
Dhe për fatin e mirë të të gjithëve, raketa ra në det.
Ndërkohë mediat kanë shkruar se kjo vuajtje e japonezëve kishte zgjatur rreth 16 minuta.
Kjo pasi që ishte ora 5.58 kur Koreja e Veriut shkarkoi raketën e parë mbi territorin e Japonisë që nga viti 2009, ndërkohë që në orën 6.14 ishte shpërndarë informata se raketa kishte rënë në det. /Telegrafi/
