Derisa vendet e pasura po largojnë masat kufizuese, konturat e ekonomisë pas pandemisë COVID-19 po bëhen më të qarta. Trendi i fundit është një rritje botërore e shpenzimeve kapitale, ndërsa parashikuesit vlerësojnë se investimi i përgjithshëm real në të gjithë botën, së shpejti do të jetë një e pesta më i lartë se sa para pandemisë.
Deri në vitin 2022, kompanitë në S&P 500 parashikohet të shpenzojnë një të dhjetën më shumë në fabrika, teknologji, kërkim dhe zhvillim dhe nisma të ngjashme. Planet e kompanive të mëdha për shpenzime vazhdojnë të rriten çdo ditë. AT&T thotë se do të shpenzojë 24 miliardë dollarë në vit në rrjetet e saj. Sony po grumbullon 18 miliardë dollarë në një projekt zgjerimi.
Ky është një ndryshim i rëndësishëm, sepse para COVID-19, firmat nuk ishin kaq të angazhuara në shpenzimet kapitale. Investimi i biznesit në Shtetet e Bashkuara të Amerikës kishte ngecur në krahasim me PBB-në, për disa dekada.
Kompanitë e mëdha të teknologjisë, produktet e të cilave janë shumë të rëndësishme për këtë ndryshim, kanë udhëhequr shpenzimet në investime. Në vitin 2020, ato përbënin një të tretën e shpenzimeve totale në kërkim dhe zhvillim në indeksin S&P 500 – këtë vit ato po rrisin shpenzimet kapitale me 30 për qind në krahasim me vitin 2019.
Shitësit me pakicë, më në fund, po investojnë më tepër në ofertat online për të konkurruar me Amazon. Restorantet vazhdojnë të përmirësojnë shërbimin e shpërndarjes, edhe ndërkohë që masat kufizuese lehtësohen, për të pasur sa më shumë fitime.
Konsulencat po gjejnë mënyra për ta mbajtur personelin të lidhur edhe kur ata nuk janë në zyrë. Rritja në dërgesat botërore të kompjuterëve për kompanitë, do të jetë edhe më e shpejtë këtë vit.
Mbetet për t’u parë nëse norma pas pandemisë COVID-19 do të nxisë një nga shpenzimet më të larta strukturore të investimeve, apo nëse firmat do të kthehen sërish në mënyrat e tyre të vjetra. Megjithatë, tani për tani, mund të vlerësojmë rritjen botërore të shpenzimeve kapitale, ato premtojnë një formë më dinamike të kapitalizmit. /Telegrafi/