Përgjigja e FIFA-së se çdo gjë ka qenë në rregull në Mitrovicë gjatë ndeshjes së futbollit, Kosova – Haiti ka çmendur drejtuesit e Federatës serbe të futbollit (FSS) dhe opinionin e futbollit në këtë vend.
FSS-ja kishte kërkuar që Kosovës t’i heqet e drejta e ndeshjeve ndërkombëtare, për shkak të, sipas tyre, shkeljeve të rënda në lidhje me respektimin e modaliteteve.
Përgjigja e FIFA-së ka qenë se çdo gjë ishte në rregull dhe se Kosova ka respektuar deri në fund modalitetet e caktuara për zhvillimin e ndeshjeve ndërkombëtare nga komisioni për çështje emergjente të FIFA-së më 10 janar të këtij viti.
“Hipokritët: FIFA e pranoi Shqipërinë e madhe”, ishte titulli i gazetës beogradase, Kurir. Sipas saj, drejtuesve të FIFA-së nuk po iu penguaka, paraqitja e përfaqësueses së Kosovës me simbole të shtetit dhe kombëtare, transmeton “Sporti1”.
B92, një medium tjetër beogradas, kinse me qëndrim më të moderuar, ka raportuar se “FIFA refuzoi ankesën e FSS-së për Kosovën”.
“Kosova mund të luaj e lirë”, është titulli i gazetës, Alo. “FIFA refuzoi kërkesën e FSS-së, Kosova mund të luaj lirshëm ndeshjet ndërkombëtare”, ishte titulli i Blic. /Sporti1/Telegrafi/