Me ndeshjen e të dielës ndaj Belgjikës, ka përfunduar Kampionati Evropian i Divizionit B për Kosovën U-18 në hendboll (djemtë).
Përfaqësuesja jonë humbi me rezultat 30-25, ndonëse pas pjesës së parë kishte epërsi bindëse, 15-9. Në pjesën e parë djemtë tanë kanë dominuar plotësisht dhe kanë krijuar epërsi deri në shtatë gola.
Shtatë gola ishte dallimi edhe në fillim të pjesës së dytë, por Belgjika bëri ndryshim në mënyrën e vendosjes në mbrojtje, kurse djemtë tanë nuk u gjendën si duhet më pas. Një seri 13-0 e Belgjikës ishte vendimtare për rezultatin në fund.
Kosova është renditur e shtata, përkatësisht e fundit. Por, në disa ndeshje djemtë tanë kanë dëshmuar se megjithatë kanë të ardhme. Shumica e lojtarëve janë ende 16-vjeçarë dhe për ta Evropiani U-18 është një përvojë shumë e rëndësishme për karrierën e mëtejme.
Prej kësaj gjenerate megjithatë pritet shumë. Për shkak të vështirësive që klubet i hasën gjatë pandemisë, ka pasur një shkëputje në punën me të rinj dhe kjo po vërehet tani.
Por, angazhimi i të gjithëve është që situata të kalohet dhe të kthehemi në rrugën e duhur.