Telefonata e shumëpritur u krye. Donald Trump dhe Vladimir Putin folën me njëri-tjetrin për 50 minuta pasditen e së shtunës.
Komunikimi i parë mes dy presidentëve, që nuk i kanë kursyer lavdet për njëri-tjetrin, është interpretuar si “embrioni i ndërtimit të marrëdhënieve të reja mes Rusisë dhe Shteteve të Bashkuara”.
Lajmin për kryerjen e telefonatës e ka shpërndarë zëdhënësi i Shtëpisë së Bardhë, Sean Spicer, jo nga foltorja e zakonshme, por përmes platformës së preferuar të shefit të tij, Twitter-it.
“Pas bisedës prej 45 minutave me Angela Merkelin, presidenti i Shteteve të Bashkuara është duke realizuar telefonatën e tretë nga pesë të tilla me krerët botërorë, me presidentin rus, Vladimir Putin”, shkruan ai, duke e shoqëruar këtë me një foto ku me telefon në vesh është Donald Trump në prani të zëvendësit të tij, Mike Pence, dhe anëtarë të tjerë të stafit.
Telefonata është mirëpritur në Rusi, ndërsa në SHBA dhe Evropë kritikët e politikave të Putinit janë në ankth. Ata i tremben mundësisë që Trump të braktisë zotimet e Shteteve të Bashkuara në kuadër të NATO-s dhe jo pa shkak.
Vetë Trump gjatë fushatës elektorale pati deklaruar disa herë se do të rishikojë kontributet e Uashingtonit në Aleancë. /Top Channel/