Përfaqësues të Romës kanë udhëtuar drejt Spanjës për të biseduar me anësorin e Real Sociedadit, Adnan Januzaj, të cilin klubi italian dëshiron ta huazojë me opsionin e blerjes.
Sipas mediave italiane duke përfshirë edhe Sportitalia e Sky Sport Italia, delegacioni i Giallorossëve ndodhet në Spanjë për negociata të avancuara.
Futbollisti shqiptar vlerësohet ndërmjet 12 e 15 milionë euro, ndërsa bisedimet do të orientohen në shpërndarjen e kësaj shumë – gjegjësisht sa do të paguhet për huazimin dhe sa për blerjen.
Roma ka nevojë për të gjetur zëvendësues për Nicolo Zaniolon, i cili nuk do të luajë në pjesën e mbetur të sezonit për shkak të lëndimit të ligamentit kryesor të gjurit.
Januzaj, i cili do të mbushë 25 vjet në muajin e ardhshëm, është lidhur edhe me Milanin, si alternativë në rast të shitjes së Susos.
Ai është pjesë e Sociedadit nga viti 2017 kur u transferua nga Manchester Unitedi për 8.5 milionë euro dhe ka kontratë deri në vitin 2022. /Telegrafi/