Atë çfarë po e ngrit si shqetësim prej kohësh opozita, shoqëria civile e kanë dokumentuar. Iniciativa për Progres përmes një publikimi kanë konfirmuar se brenda tre muajve të parë të vitit 2024, janë nënshkruar 108 kontrata përmes procedurës së negociuar pa publikimin e njoftimit për kontratë, me një vlerë totale që kap më shumë se 30 milionë euro
Telekomi i Kosovës, Korporata Energjetike e Kosovës, Ministria e Mbrojtjes e Ministria e Infrastrukturës, janë disa nga institucionet e Kosovës, sipas Iniciativës për Progres (INPO) prijnë me nënshkrime të kontratave një burimore në tre muajt e parë të vitit 2024.
Sipas kësaj organizate janë nënshkruar 108 kontrata përmes procedurës së negociuar pa publikimin e njoftimit për kontratë, me një vlerë totale që kap vlerën e më shumë se 30 milionë eurove.
“Gjatë tre mujorit të parë të vitit 2023, autoritetet kanë nënshkrua 85 kontrata ndërsa në tre mujorin e parë të 2024 ka një rritje nga 85 në 108 kontrata, ndërsa për nga vlera ka një ulje nga 84 milion euro në 30 milion euro. Kontrata që kanë të bëjnë më sigurim fizik të objekteve janë kontratat që janë më të atakuar në OSHP dhe janë kontratat që bëhen nga autoriteti kontraktues më procedurë të përshpejtuar”, deklaroi Arbër Kabashi nga INPO.
Ish-ministrja e Financave tani deputete e LDK-së, Hykmete Bajrami ka thënë se dokumenti i punuar nga INPO tregon më së miri keqpërdorimet me paranë publike e korrupsionin që sipas saj po bënë qeverisja aktuale.
“Ligji i’a mundëson opozitës që përmes 40 nënshkrimeve të themelojë komisionin hetues parlamentar, do të bëjmë një tentativë të tille pastaj do të shohim hapat e radhës. Do të ishte e befasuar në qoftë se Prokuroria deri më tani nuk është duke u marrë më këto gjera”, tha Hykmete Bajrami, deputete e LDK-së.
Akuza të njëjta kanë edhe nga Partia Demokratike e Kosovës.
“Qeveria duhet të shkoj urgjentisht në zgjedhje të parakohshme. Qeveria tashmë është e dominuar nga grupet e interesit dhe shkalla e lart e korrupsionit. Konsideroj që opozita duhet sa më shpejt edhe një herë të kërkoj nga Kryeministri që vendi të shkoj në zgjedhje, pasi ai, nuk e ka aftësinë të ndërpres këtë dukuri të korrupsionit”, deklaroi Ferat Shala, deputet i PDK-së.
Iniciativa për Progres po ashtu ka ngritur shqetësimin e mos kompletimit të bordit të Organit Shqyrtues të Prokurimit, gjë që sipas tyre po lë hapësirë që të ngritet numri i kontratave një burimore./RTV Dukagjini/
