Në tetë muajt e fundit asnjë person nga Kosova nuk ka shkuar në Siri për t’iu bashkuar luftës për sulme terroriste. Madje, Kosova nga këto sulme është vend i sigurtë, por jo edhe imune. Kështu ka deklaruar në emisionin “Euro Tribuna”, në Tribuna Channel, zëdhënësi i Policisë së Kosovës, Baki Kelani.
Ai ka thënë se Policia e Kosovës ka arritur rezultate sa i përket parandalimit të sulmeve terroriste.
E, duke folur për përdorimin e substancave narkotike në vend, Kelani ka pohuar se lloji i cili përdoret më së shumti është marihuanë, madje duke treguar edhe shifra se sa kanë arritur të konfiskojnë këtë lloj.
