Dy luftanije gjermane do të kalojnë nëpër ngushticën e ndjeshme të Tajvanit në mes të këtij muaji, duke u bërë anijet e para të marinës gjermane që e bëjnë këtë në 22 vjet, ka njoftuar revista Spiegel.
Muajin e kaluar raportohej se luftanijet po prisnin urdhra nga Berlini për të lundruar në ngushticë.
Spiegel citoi burime të paspecifikuara duke thënë se Pekini nuk do të njoftohet zyrtarisht për kalimin e anijeve gjermane për të theksuar se Berlini e sheh udhëtimin si normal.
Ndërsa SHBA-ja dhe vendet e tjera, përfshirë Kanadanë, kanë dërguar anije luftarake nëpër ngushticë në javët e fundit, ky do të ishte kalimi i parë i marinës gjermane që nga viti 2002.
Kina pretendon sovranitetin mbi Tajvanin e qeverisur në mënyrë demokratike dhe thotë se ka juridiksion mbi rrugën ujore gati 180 kilometra të gjerë, shkruan Reuters, përcjell Telegrafi.
Tajvani kundërshton me forcë pretendimet e Kinës për sovranitet dhe thotë se vetëm njerëzit e ishullit mund të vendosin për të ardhmen e tyre.
Bëhet e ditur se ngushtica e Tajvanit është një rrugë kryesore tregtare përmes së cilës kalojnë rreth gjysma e anijeve globale të kontejnerëve, dhe si SHBA-ja ashtu edhe Tajvani thonë se është një rrugë ujore ndërkombëtare.
Komandanti i grupit të detyrës detare gjermane, kundëradmirali Axel Schulz, tha muajin e kaluar se një pasazh i tillë do të tregonte përkushtimin e Gjermanisë ndaj një rendi të bazuar në rregulla dhe zgjidhje paqësore të konflikteve territoriale.
Ndryshe, dy anijet gjermane po marrin pjesë në stërvitjet në rajon me Francën, Indonezinë, Italinë, Japoninë, Malajzinë, Singaporin, Filipinet dhe SHBA-në.
Lundrimet nëpër rrugët ujore nga luftanijet e huaja dënohen rregullisht nga Pekini, i cili thotë se ato “minojnë paqen dhe stabilitetin” në rajon.
Gjermania, për të cilën Kina dhe Tajvani janë partnerë kryesorë tregtarë, u është bashkuar vendeve të tjera perëndimore me zgjerimin e pranisë së saj ushtarake në rajon në përgjigje të ambicieve territoriale në rritje të Pekinit. /Telegrafi/