Për Komunën e Prishtinës, aksidenti i autobusit me rreth 60 nxënës dhe arsimtarë të shkollës së muzikës “Prenk Jakova” në Prishtinë, që ndodhi të shtunën, paraqet një fatkeqësi kombëtare dhe të gjithë qytetarët e Prishtinës dhe të mbarë Kosovës i kishin sytë kah këta fëmijë dhe luteshin e uronin që nuk kishte ndodhur më e keqja, thuhet në komunikatën e KK të Prishtinës, që udhëhiqet nga LDK-ja.
“Në momentin kur të afërmit dhe qytetarët tjerë të Kosovës pritnin të merrnin lajmin… se sa prej fëmijëve janë lënduar, sa rëndë janë lënduar dhe kush janë të lënduarit, RTK-ja vendosi të transmetojë drejtpërdrejt kongresin e partisë në pushtet. Për më tepër, edhe kur emisioni i lajmeve filloi me shumë vonesë, qytetarëve iu servua kongresi i partisë në pushtet. Sipas politikës redaktuese të RTK-së, fatkeqësia kombëtare ku aksidentohet autobusi me 60 fëmijë, nuk merituaka të transmetohet para kongresit të partisë në pushtet”, thuhet në deklaratë.
Duke shprehur indinjatën e thellë me politikën e tillë redaktuese, “Komuna e Prishtinës pret që RTK të kryejë misionin e tij si televizion publik në shërbim të qytetarëve dhe publikut, e jo në shërbim të partive politike dhe pushtetit”.
“Qytetarët e Kosovës e njohin RTK si televizion publik, e jo si televizion shtetëror që vihet në shërbim të pushtetit”.
Komuna ia përkujton RTK-së se shpenzon 8.2 milionë euro taksa të qytetarëve të varfër të Kosovës për të qenë në shërbim të tyre, andaj i bën thirrje Kuvendit të Kosovës të mbikëqyrë se si po keqpërdoren këto mjete nga kjo politikë redaktuese, që, sipas saj, është jashtë çdo etike profesionale dhe në kundërshtim me qëllimin e themelimit dhe funksionimit të RTK-së si televizion publik. /Telegrafi/