Kryetari i Republikës së Maqedonisë së Veriut, Stevo Pendarovski, sot u takua me delegacionin e Forcave të Armatosura të Bullgarisë, i udhëhequr nga komandanti i Shtabit të Përgjithshëm, gjeneral Andrej Bocev.
Në takim, siç njoftojnë nga kabineti i kryetarit Pendarovski, është vërtetuar bashkëpunimi mes dy armatave të dy vendeve, por edhe bashkëpunimi i përgjithshëm mes Maqedonisë së Veriut dhe Bullgarisë në mbrojtje, nga ku u konstatua se në këtë mënyrë të dy shtetet kontribuojnë për stabilitetin dhe sigurinë e rajonit. Pendarovski potencoi se përvoja e forcave të armatosura të Bullgarisë, si vend anëtar në NATO, mund të përdoret për Armatën e Republikës së Maqedonisë së Veriut, njofton Telegrafi Maqedoni.
Kryetari Pendarovski theksoi se Marrëveshja për miqësi, fqinjësi dhe bashkëpunim të mirë mes Maqedonisë së Veriut dhe Bullgarisë, solli dinamikë pozitive në marrëdhëniet dypalëshe.
Pendarovski falënderoi gjeneral Bocev për përkrahjen e Bullgarisë në aspiratat e Maqedonisë së Veriut në NATO./Telegrafi/