Palestra “Sezai Surroi” ishte e ndezur më shumë se kurrë më parë me një atmosferë sensacionale dhe brohoritje të pareshtura të Arpaxhikëve dhe Shqiponjave që kishin ardhur nga Peja.
Çerekun e parë të dyja skuadrat luajtën me shumë tension dhe nervozizëm, gjë që u vërejt në fazën e sulmit ku pat shumë gabime, por megjithatë pejanët me trepikëshat e tyre krijuan një epërsi solide, 8-15.
Çereku i dytë i takoi të rikthyerit nga lëndimi, Blerim Mazrekut, i cili ishte i pandalshëm në trapez me 10 pikë, duke ia mundësuar kështu ekipit të tij që ta ruajë epërsinë, 29-34.
Me lojën e mirë të Muhamed Hasanit dhe trepikëshat e Rokas Uzas, vendasit e dominuan çerekun e tretë dhe kështu dolën në epërsi për herë të parë në këtë takim, 54-46.
Në çerekun e katërt u zhvillua luftë për çdo top në parket. Peja i konsolidoi radhët e veta dhe ia doli të kthehej në lojë. Tetë sekonda pa përfunduar takimi, në skenë doli Dardan Berisha me një trepikësh për ta dërguar ekipin e tij në finale, 63-64
Peja tani do të takohet në finale me Sigal Prishtinën e cila të enjten e mposhti Trepçën në gjysmë-finalen e parë.
| Koshashënuesit më të mirë të Sigkos Bashkimit | ||
| 1 | Rokas Uzas | 18 pikë |
| 2 | Kejuan Johnson | 14 pikë |
| 3 | Muhamed Hasani | 10 pikë |
| 4 | Mark Dawson | 10 pikë |
|
Koshashënuesit më të mirë të Pejës
|
||
| 1 | Blerim Mazreku | 20 pikë |
| 2 | Dardan Berisha | 15 pikë |
| 3 | Alban Veseli | 13 pikë |
| 4 | Samir Shaptahoviq | 10 pikë |
/Telegrafi/