Komuna e Pejës është në përfundim të disa projekteve të rëndësishme në fushën e Kulturës dhe Sportit.
Në mesin e këtyre projekteve janë rinovimi i Teatrit “Istref Begolli”, ndërtimi i shtegut të Atletikës në Karagaq, ndërtimi i fushës së futbollit në Baran, rinovimi i arenës sportive “Valon Begolli” gjatë vitit 2025, dhe ndërtimi i palestrës sportive në fshatin Zahaq.
Drejtoresha për Rini, Kulturë dhe Sport, Xhenet Syka, në një intervistë për Telegrafin, ka theksuar se këto investime do të përmirësojnë pamjen e qytetit dhe do të kontribuojnë në zhvillimin e kulturës dhe sportit në Pejë.
Syka shpreson që të gjitha projektet, përveç palestrës në Zahaq, të përfundojnë para zgjedhjeve lokale të 2025-ës.
“Dua të besoj se përveç palestrës në Zahaq, të gjitha projektet do të përfundojnë para zgjedhjeve lokale,” ka thënë Syka.
Rinovimi i Teatrit “Istref Begolli” është një nga projektet më të rëndësishme kulturore të këtij mandati, ku pas 25 vitesh liri, ky teatër po përjeton një transformim të plotë dhe profesional.
Syka ka theksuar se 70 për qind e buxhetit për këtë projekt është shpenzuar, ndërsa 30% e mbetur do të përdoret për instalimet për ndriçimin dhe zërimin e teatrit.
“Për sa i përket teatrit, është një projekt kapital dhe i pari pas 25 viteve që rinovohet profesionalisht. Deri tani është shpenzuar 70% e buxhetit dhe 30% e mbetur do të përdoret për dy lotet e fundit,” ka thënë Syka.
Sa i përket fushës së sportit, Komuna e Pejës po investon në zhvillimin e shtegut të atletikës në Parkun Karagaq dhe rinovimin e arenës sportive “Valon Begolli”.
Syka ka theksuar se shtegu i atletikës do të ndihmojë në ofrimin e kushteve të nivelit të lartë për ecje, vrapim dhe ushtrime, duke përdorur një shtresë të hollë asfalti që i paraprin tamtamit.
“Jemi duke punuar intensivisht në shtegun e atletikës në Parkun Karagaq. Ky shteg do të përdorë një shtresë të hollë asfalti për të ofruar një hapësirë të sigurt dhe të përshtatshme për aktivitetet atletike”, ka thënë Syka.
Rinovimi i arenës sportive “Valon Begolli” dhe ndërtimi i palestrës në Zahaq do të vazhdojnë gjatë vitit 2025, ndërsa shumë shpejt do të organizohet përurimi i fushës së futbollit në Baran.
“Edhe arena sportive ‘Valon Begolli’ do të rinovohet dhe do të vazhdojmë punimet në palestrën e Zahaq gjatë vitit 2025. Shumë shpejt do të ju ftojmë në përurimin e fushës së futbollit në Baran”, ka përfunduar Syka.
Me këto investime, qyteti i Pejës synon të forcojë rolin e saj si një qendër e rëndësishme kulturore dhe sportive. /Telegrafi/