Peja është kualifikuar në gjysmëfinale të Final 8 të Ligës Unike, ku shënoi fitore ndaj Vllaznisë së Shkodrës me rezultat 73-90 (17:16, 17:26, 19:23, 20:25).
Ndeshja nisi e baraspeshuar, me të dy skuadrat që nuk arrinin të shkëputeshin në rezultat, derisa çereku i parë përfundon 17:16 për shkodranët. Peja ishte më e mirë në periudhën e dytë, ku kishte epërsi deri në dhjetë pikë, 30:40, derisa pjesa e parë përfundon 34-42.
Peja e kontrolloi lojën edhe në pjesën e dytë. Verdhezinjtë ishin më të mirë edhe në periodën e tretë, që e fituan 19:23, kurse rezultati në semafor pas 30 minutash ishte 53:65. 10 minutat ishin formalitet, derisa pejanët thelluan epërsinë, kurse triumfuan me shifrat 73-90.
Te Vllaznia u dallua Jeron Cooper me 21 pikë dhe shtatë kërcime, derisa te Peja më të dalluarit ishin Brandon Walters me 23 pikë e 15 kërcime dhe Dardan Berisha me 26 pikë e pesë asistime.
Peja në gjysmëfinale do të ballafaqohet me Rahovecin që u kualifikua pa lojë pas tërheqjes së Teutës.
Të mërkurën do të zhvillohen dy ndeshjet tjera çerekfinale, kurse pjesa finale e garave zhvillohet në Durrës.
Orari
E mërkurë
16:00 Goga Basket-Tirana
19:00 Sigal Prishtina-Golden Eagle Ylli
Gjysmëfinalet dhe finalet
13 prill
16:00 Gjysmëfinalja e pare: Rahoveci-
19:00 Gjysmëfinalja e dytë
14 prill
16:00 Ndeshja për vendin e tretë
19:00 Finalja e madhe.