Edhe një javë do të bëheshin katër muaj të plotë që nuk ka shënuar fitore Peja në Superligë (e fundit, 15 nëntor 2017).
Por me lojën e sotme ndaj Kerasanit, verdhezinjtë nuk kanë lënë që të mbushen katër muaj pa fitore në Superligë dhe me 66-58 mposhtën Kerasan Prishtinën në Karagaç, për të regjistruar fitoren e gjashtë të stinorit.
Kjo ka qenë fitorja e parë pas 11 xhirove të zhvilluara për verdhezinjtë që po drejtohen aktualisht nga Petrit Zeqiri, ndërsa lojtari më i dalluar te ekipi fitues ka qenë Rron Grapci me përvojë, që ka shënuar 15 pikë, 11 kërcime dhe gjashtë asistime në fitore.
Përveç Grapcit, 15 pikë ka shënuar edhe Beqë Kovaçi, ndërsa Rron Ukaj dhe Blendi Kadusha kanë shënuar nga 10 të tjerë në fitore.
Te Kerasan Prishtina në anën tjetër, lojtari i vetëm që ka shënuar pikë dyshifrore ka qenë Arbnor Haliti, 29 pikë. Asnjë lojtar tjetër s’ka arritur të shënojë pikë dyshifrore te Kerasani i ngujuar në fund të klasifikimit. /borozani/