Dueli ndërmjet Pejës dhe Bashkimit, në xhiron e fundit të stinorit të rregullt të Superligës, do të vendos përfundimisht se cila skuadër do të nis nga pozita e dytë Play-Off e Superligës.
Peja dhe Bashkimi do të ndeshen mes veti në gjysmëfinale të Play-Off, por, vendi i dytë përcakton se cila skuadër merr epërsinë e terrenit vendas aty, që është shumë me rëndësi në rrugë për finale.
Deri tash, Bashkimi është në përparësi. Bashkimi ka fituar 2 ndeshje ndaj Pejës, ndërsa Peja një ndaj Bashkimit. Ndërsa dallimi në pikë të shënuara në duelet e ndërmjetme është 8 pikë më shumë për ekipin prizrenas, transmeton borozani.
Pejës i duhet fitorja me mbi 8 pikë epërsi për të kryer stinorin e dyta dhe për të marrë avantazhin në Play-Off ndaj Bashkimit. Në anën tjetër, Bashkimit përveç fitores, i bën punë edhe humbja e ngushtë ndaj verdhezinjëve.
Ndeshja zhvillohet nesër në “Karagaç” me fillim në ora 17:00, ka bërë të ditur sot FBK.