Patozi tha se Rama po luan dhe po përdor për qëllime politike katër viktimat e demonstratës së përgjakshme, që la katër të vdekur dhe dhjetëra të plagosur.
Patozi nënvizoi se mazhoranca kishte shpresuar për reflektim nga ana e socialistëve pas 21 janarit, por “po e shikojmë që qenka ende herët”. “Ju vini në parlament për të vijuar 21 janarin”, tha Patozi.
Kryetari i Grupit parlamentar demokrat tha se opozita ka ardhur në parlament për të gjuajtur me gurë, “njësoj si ata para Kryeministrisë, sepse keni marrë porosi që të veproni kështu”. Patozi akuzoi opozitën se po kërkon të pengojë hetimet për zbardhjen e 21 janarit, të cilat po përparojnë për të çuar përpara drejtësisë përgjegjësit kryesorë.
Patozi reagoi gjithashtu për tabulatet telefonike, duke thënë se nuk ka arsye për tu trembur prej tyre. Debati vazhdoi me fjalën e ministrit të Transporteve, Sokol Olldashi i cili tha se Edi Rama është politikani më i korruptuar. Ndërkohë deputetët socialistë iu afruan përsëri foltores së parlamentit, për të mos lejuar që të flisnin përfaqësuesit e mazhorancës. /Telegrafi/