Vazhdojnë përplasjet mes OBRM-PDUKM-së dhe LSDM-së pasi dje kreu i Kuvendit, Talat Xhaferi hodhi poshtë nismën për referendum mbi shfuqizimin e Marrëveshjes me Bullgarinë, pasi e njëjta u vlerësua si anti-kushtetuese.
Nga OBRM-PDUKM thonë se nisma është plotësisht ligjore dhe se sipas tyre, LSDM dhe Xhaferi do të bëjnë gjithçka për të shmangur referendumin.
“U vërtetua se LSDM-ja antimaqedonase ka fluks konfrontimi me popullin. U vërtetua se së bashku me Talat Xhaferin do të bëjnë gjithçka për të shmangur referendumin në të cilin populli do të thotë se çfarë mendon për marrëveshjen e dëmshme me Bullgarinë. Referendumi për anulimin e Ligjit për Ratifikimin e Marrëveshjes me Bullgarinë është në përputhje me nenin 24 të Ligjit për Referendum, dhe nuk bie ndesh me Kushtetutën. Kjo pyetje e referendumit nuk e ndryshon Marrëveshjen, përkundrazi, Ligji i Ratifikimit që e shpall atë të vlefshëm është i kontestuar”, thonë nga OBRM-PDUKM.
Ndërsa nga LSDM thonë se nisma për referendum është mashtrim i Mickoskit për të shpëtuar karrigen e tij në parti.
“Hristijan Mickoski me qëllim parashtroi një iniciativë për referendum e cila është jokushtetuese, duke e ditur vetë se referendumi i tij është i destinuar të dështojë për shkak të mbështetjes së dobët të qytetarëve. Kushtetuta si akti më i lartë juridik është i qartë: Neni 118 përcakton qartë se marrëveshjet ndërkombëtare që janë ratifikuar janë pjesë e rendit të brendshëm juridik dhe nuk mund të ndryshohen me ligj. Marrëveshja e fqinjësisë së mirë është marrëveshje ndërkombëtare dhe sipas Kushtetutës, efekti juridik i saj nuk mund të ndryshohet me ligj, siç e imagjinon Mickoski”, theksojnë nga LSDM.