Pasagjerit e aeroplanit që planifikohej të udhëtonte nga Dallasi në Los Angeles kanë humbur durimin, dhe në një moment kanë shkëmbyer grushta duke bërë që udhëtimi të shtyhet.
Një video e publikuar në Snapchat shfaq momentin kur grushtohen dy persona në aeroplanin e aviokompanisë Southwest Airlines, duke krijuar panik tek pasagjerët tjerë, transmeton Telegrafi.
Në video mund të dëgjohen pasagjerët duke bërtitur, dhe duke u grindur brenda aeroplanit.
Një burrë i veshur me bluzë ngjyrë hiri shihet duke e goditur një burrë tjetër i cili nga grushtat rrëzohet në karrige. Por, kur dukej se situata u qetësua ata rifilluan të grushtohen.
Zyrtarët e aviokompanisë kanë sqaruar se çfarë në të vërtetë kishte ndodhur.
“Më 2 mars, aeroplani i aviokompanisë Southwest Airlines që ishte paraparë të fluturojë nga Dallasi në Los Angeles, është shtyrë për shkak të një rrahje që ka ndodhur brenda aeroplanit”, thuhej në komunikatën e aviokompanisë.
Por pas ndërhyrjes së forcave të rendit pjesëmarrësit në rrahje janë shoqëruar në polici për t’u intervistuar, ndërsa pasagjerët më disa orë vonesë kanë vazhduar rrugëtimin e tyre. /Telegrafi/
