Pas Tiranës edhe Bashkia e Durrësit njofton pezullimin e transportit publik për një afat të pacaktuar në vijim të masave mbrojtëse për parandalimin e përhapjes së Coronavirusit COVID 19.
Bashkia Durrës njofton qytetarët se prej datës 12 mars, do të pezullohet shërbimi i transportit publik për një afat të pacaktuar.
Prej orës 08:00 të datës 12 mars, këto linja do të ndërpriten deri në një njoftim të dytë: shërbimi i transportit qytetas (linjat brenda qytetit të Durrësit), shërbimi i transportit rrethqytetas (linjat që lidhin qytetin me njësitë administrative ish-komuna) dhe shërbimi i transportit ndërqytetas ushqyes (linjat që lidhin Bashkinë Durrës me Bashkinë e Krujës dhe Bashkinë e Shijakut).
Bashkia Durrës kërkon mirëkuptimin e qytetarëve për pezullimin e përkohshëm të shërbimit të transportit publik, si një masë të domosdoshme për të parandaluar përhapjen e COVID 19. /Ora News/