Anëtarët e grupit, BTS, RM dhe Jin janë diagnostikuar me COVID-19.
Një ditë pasi anëtari tjetër i grupit të djemve, Suga rezultoi pozitiv për sëmundjen të premten, Big Hit Music – kompania e menaxhimit për grupin e njohur të muzikës K-pop – njoftoi në një deklaratë të shtunën se RM, 27-vjeç dhe Jin, 29, gjithashtu janë infektuar me coronavirus.
“Pas kthimit nga Shtetet e Bashkuara të Amerikës, duke ndjekur orarin e tij personal si pjesë e periudhës së pushimeve të tij zyrtare, RM iu nënshtrua menjëherë testit PCR, i cili rezultoi negativ dhe u fut në vetëkarantinë në shtëpinë e tij, siç kërkohet nga procedurat e kontrollit të COVID-19. Megjithatë, ai iu nënshtrua testit PCR të shtunën, përpara daljes së tij të planifikuar nga karantina dhe u zbulua se ishte pozitiv për COVID-19”, thuhet në deklaratë.
“Jin u kthye në Kore të hënën, më 6 dhjetor dhe iu nënshtrua testit PCR menjëherë pas kthimit të tij dhe përsëri para lirimit të tij nga vetë-karantina, testi doli negativ në të dyja rastet. Sidoqoftë, duke ndjerë simptoma të ngjashme me gripin [të shtunën] pasdite ai iu nënshtrua testit PCR dhe doli pozitiv për COVID-19 më vonë gjatë mbrëmjes”, vazhdoi deklarata.
Qeveria e Koresë së Jugut kërkon që të gjithë udhëtarët ndërkombëtarë të karantinohen për 10 ditë, pavarësisht nga statusi i tyre i vaksinimit, raportoi CNN, shkruan People.
RM dhe Jin të dy janë vaksinuar me dy dozat kundër COVID-19 në fund të gushtit, vuri në dukje Big Hit Music.
Agjencia tha gjithashtu se as RM dhe as Jin nuk “kishin kontakt” me anëtarët e tjerë të BTS pas kthimit të tyre në Kore.
Më herët gjatë javës, Big Hit Music njoftoi se anëtari i BTS, Suga, rezultoi pozitiv me COVID-19 në prag të Krishtlindjes pasi u kthye në Korenë e Jugut nga SHBA.
Lajmi për rezultatet pozitive të testit COVID-19 të tre anëtarëve vjen pasi BTS njoftuan se do të bënin një pushim nga skena muzikore në fillim të këtij muaji.
Big Hit Entertainment tha se pushimi do t’u sigurojë anëtarëve të BTS mundësinë për t’u “rifrymëzuar dhe rimbushur me energji krijuese”. /Telegrafi/