Pas shumë ankesave dhe rivlerësimeve, OSHP-ja ka shpallur fitues një kompani për ndërtimin e Klinikës emergjente në Prishtinë.
Por, edhe në këtë rast OSHP-ja e ka shpallur fituesin pa e marrë parasysh mendimin e ekspertit shqyrtues, i cili kishte thënë se kontrata duhet anuluar, pasi që Ministria e Shëndetësisë është duke shkelur disa dispozita të Ligjit të Prokurimit, raporton KTV.
Për më tepër, pronari i kompanisë “Al Trade”, e cila u shpall si fituese e tenderit për ndërtimin e Klinikës emergjente, Bajram Gashani, tashmë është i akuzuar në rastin e tjetërsimit të disa tokave në Çagllavicë.
E, këto janë arsye të mjaftueshme për Arton Demhasajn, nga Organizata Çohu, e cila monitoron procesin e tenderëve, që OSHP-ja të anulonte tenderin në fjalë.
Por , Ministria e Shëndetësie ka mohuar pretendimet për shkelje të LPP. Sipas Ministrisë, kontrata pritet të nënshkruhet pas disa javësh, e ndërtimi i objektit pritet të përfundojë brenda një periudhe prej 3-5 vjet.
KTV-ja ka kontaktuar me pronarin e kompanisë fituese “Al Trade” i cili ka thënë se ka respektuar të gjitha procedurat dhe fillimi i qershorit është koha kur kompania do të fillojë ndërtimin. Kohavisioni ka kërkuar sqarime nga OSHP-ja lidhur me këto ankesa, por nuk ka marrë përgjigje.