Një 20-vjeçar që ishte nën ndikim të alkoolit, kishte mbetur i habitur kur u zgjua nga gjumi dhe e kuptoi se taksisti e kishte dërguar 100 milje më larg destinacionit.
Joseph Fergie ishte zgjuar nga gjumi nga taksisti pas më shumë se tre orë vozitje, që në fakt kjo vozitje do të duhej të zgjaste 15 minuta – nga një klub i natës në Edinburg deri në shtëpinë e tij në Leith të Skocisë, transmeton Telegrafi.
Punonjësi i një “call center” ishte futur në Uber (taksi), pas një nate plotë me alkool në një klub të natës, dhe rrugës për në shtëpi në karriget e pasme të veturës e kishte zënë gjumi.
Por kur u zgjua brenda veturës Toyota Prius me të cilën po udhëtonte ishte larguar 112 milje larg shtëpisë së tij, duke përfunduar në Kirckcudbright në Dunfries. E fatura e transportit kapte shumën e 395,85 funte.
Duke parë se kishte përfunduar në një lokacion të panjohur dhe i rrethuar me dele, Fergie mendoi se gabimisht ishte dërguar në Musselburgh, një qytezë në lindje të Lothian, pesë milje larg qendrës së Edinburgut.
Por, kur kërkoi ndihmë në Snapchat e kuptoi se gjendej në anën tjetër të vendit. /Telegrafi/
