Pas dështimit për anëtarësim në Asamblenë e Përgjithshme të INTERPOL-it, Kosova rrezikon të bëhet një shtet i dështuar dhe institucionet e vendit duhet të marrin masa për kundërpërgjigje ndaj shtetit serb.
Kështu theksuan për Telegrafin njohësit e çështjeve të sigurisë dhe analistë.
Njohësi i sigurisë, Avni Islami në një prononcim për Telegrafin ka thënë se pas dështimit të Kosovës që të bëhet anëtare e INTERPOL-it, radhën e kanë institucionet e vendit që t’iu përgjigjen shtetit serb të cilët janë armiqësor ndaj Kosovës.
Islami u shpreh se duhet bllokadë totale me ata që e njohin vetëm gjuhën e forcës.
“Nëse nuk bëjmë diçka sot, ata nuk do të ndalen së punuari kundër Kosovës. Ky dështim nuk është vetëm i yni por edhe i SHBA-së, Gjermanisë dhe të gjithë atyre që na ndihmuan për shtet-formim”, ka thënë Islami.
Edhe njohësi i proceseve politike në vend, Vigan Qorolli, theksoi se mos anëtarësimi i Kosovës në organizata ndërkombëtare e rrezikon vendin të bëhet një shtet i dështuar.
Qorolli potencoi se problemet e Kosovës janë sistemike.
“Ajo nuk po dështon për faj të të tjerëve por, kryesisht për shkak të vetës së saj. Shteti i dështuar e komprometon ligjshmërinë e shpalljes së pavarësisë së saj, prandaj edhe ka shtete që mund të kërkojnë zhbërjen e saj, ndërrimin e kufijve ose bashkimin me ndonjë shtet tjetër. Deri atëherë kapja e shtetit do të jetë menyja kryesore e politikanëve të saj”, ka thënë Qorolli për Telegrafin.
Ndryshe, votimi në raundin e dytë në Asamblenë së Përgjithshme të INTERPOL-it për Kosovën ishte 68 pro, 51 kundër dhe 16 abstenime. Këto vota nuk ishin të mjaftueshme që Kosova të jetë pjesë e kësaj organizate për bashkëpunim policor. /Telegrafi/