Ideja e bashkimit të Kosovës me Shqipërinë, nuk po shihet si e pamundur, por njohësit e çështjeve politike, thonë se mund të nxis edhe krijimin e Serbisë së madhe. Në opozitë, nuk i besojnë shumë fjalëve të fundit të Presidentit Thaçi, ndërsa në Shqipëri, thonë se nuk e kanë në agjendë zyrtare.
Presidenti Hashim Thaçi, në “Debat Plus” ka thënë se pse të mos ndodhë bashkimi me Shqipërinë kur Bashkimi Evropian po e izolon, diskriminon, poshtëron, fyen e po i trajton si qytetarë të rendit të dytë shqiptarët si në ish-Jugosllavi.
Vetëvendosje thotë se është pro Bashkimit me Shqipërinë, por shton se Presidenti nuk e ka seriozisht.
“Bashkimi kombëtarë nuk është vetëm aspiratë e Lëvizjes Vetëvendosje. Ne thënë shkurt jemi “argat” të kësaj aspirate. Por nuk jemi kjo që të keqpërdoret për motive personale dhe të rrezikohet me idenë që dikush të shpëtoj nga diçka”, tha për RTV Dukagjinin, Xhelal Sfeqla.
Me rezerva, deklaratat e Thaçit po merren edhe në Shqipëri. Ushtruesi i detyrës së krye diplomatit në Shqipëri, Gent Cakaj, tha se nuk është në agjendën zyrtare të shteteve.
“Sa u përket deklaratave të Presidentit të Kosovës, kjo është një çështje që nuk është në agjendën zyrtare të asnjërit prej vendeve. Por, natyrisht ne jemi në përpjekje e sipër për të intensifikuar bashkëpunimin me Kosovën dhe vendet tjera në rajon”, tha Gent Cakaj.
Sipas profesorit universitar, Zenun Halili, kjo ide ka ardhur si presion ndaj BE-së por që edhe mund të realizohet dhe të përkrahet nga SHBA.
“Natyrisht që nëse ato [SHBA] e shohin që liderët tonë institucional punojnë shumë për këtë dhe janë të vendosur, duke pasur edhe mbështetjen e popullit, e nuk japin deklarata për konsum politik do ta pranonin atë realitet edhe pse çështjet e bashkimeve janë pak problematike në rajonin e trazuar të Ballkanit”, tha Zenun Halili.
Ai thotë se bashkimi kombëtar shqiptar, mund të nxis edhe kërkesa në Serbisë, për krijimin e Serbisë së madhe./Telegrafi/