Spanjës po i bëhet thirrje nga dy fronte të ndryshme politike të brendshme që ta njohë Kosovën si shtet i pavarur.
Pyetja e paraqitur nga Deputeti i partisë Movimiento Sumar, Vidal Matas, është pranuar nga Kongresi i Deputetëve të Spanjës dhe pritet të vendoset në rendin e ditës për diskutim.
“Pyetje për qeverinë me përgjigje me shkrim. Njohja e Kosovës si shtet”, shkruan në njoftim e publikuar nga faqja zyrtare e Parlamentit.
Vlen të theksohet fakti se kryetare e partisë Movimiento Sumar është Jolanda Diaz, aktualisht zëvendëskryeministre e Spanjës dhe ministre e Punës dhe Ekonomisë Sociale në qeverinë e Pedro Sanchez.
Në të njëjtën kohë, edhe partia tjetër “Bashkë për Katalonjën” ka paraqitur një kërkesë në parlament që shteti spanjoll ta njohë atë të Kosovës.
“Gjykata Ndërkombëtare e Drejtësisë vendosi në korrik të vitit 2010, se shpallja e pavarësisë së Kosovës nuk shkel të drejtën ndërkombëtare dhe konfirmoi se nuk ka asnjë normë në të drejtën ndërkombëtare që do ta ndalonte atë deklaratë”, shkruan në propozimin e dorëzuar.
Partia nga Katalonja thekson se refuzimi i Madridit për të njohur Republikën e Kosovës është një pengës për politikën europiane për të pranuar Ballkanin Perëndimor në BE. Madje theksohet se mos njohja është faktor destabilizues.
“Spanja vendoset në anën e Rusisë, Kinës ose Bjellorusisë kur refuzon ta njohë Kosovën si shtet”, shkruan në dokument.
Kjo forcë politike hedh poshtë justifikimet e kryeministrit Sanchez se nuk pranon pavarësinë e Kosovës pasi u shpall në mënyrë të njëanshme. /A2CNN/