Janë identifikuar 39 viktimat që humbën jetën në momentin kur u shemb ndërtesa e lartë në qytetin rus Magnitogorsk, ka njoftuar sot zëvendësministri për situata emergjente, Aleksandar Chuprian.
“Po, ata janë identifikuar. Mund të themi se janë identifikuar të gjithë 39 viktimat”, ka shtuar Chuprian para gazetarëve, transmeton Telegrafi.
Në orët e para pas tragjedisë së 31 dhjetorit, janë shpëtuar 18 persona që kanë ngecur nën rrënojat e ndërtesës. Por një ditë më pas janë shpëtuar edhe 6 tjerë në mesin e tyre dy fëmijë.
Një pjesë e ndërtesës 10-katëshe në Magnitogorsk ishte shembur në natën e 31 dhjetorit, kurse hetuesit besojnë se shembja e saj ka ndodhur si rezultat i shpërthimit të gypave të gazit brenda ndërtesës.
Një familje mund të cilësohet se ishte me fat, pasi djali i tyre 11-muajsh Ivan Fokin është gjetur i gjallë nën rrënoja ku për 36 orë qëndroi në temperaturat nën zero gradë celsius. /Telegrafi/
