Në një intervistë për Zërin e Amerikës, Matthew Palmer, Zëvendës-ndihmës Sekretar i Shtetit për Çështjet e Evropës dhe Euroazisë, tha se nëse zgjedhjet duhet të përsëriten ose jo, ky është një vendim që i takon gjykatës ta marrë dhe jo Shteteve të Bashkuara.
“Nuk u takon Shteteve të Bashkuara që ta gjykojnë atë çështje. I takon Gjykatës së Lartë të Shqipërisë ta marrë atë vendim”, thotë zyrtari i lartë i DASH.
Ai ka deklaruar se SHBA kanë rezerva për zgjedhjet e 30 qershorit, ashtu siç edhe ka evidentuar raporti i OSBE/ODIHR.
“Ekzistojnë shqetësime dhe rezerva reale në lidhje me vetë zgjedhjet, siç artikulohen nga OSBE-ja. Për sa i përket se cilat janë përgjigjet e duhura ndaj kësaj, ne do dëshironim ta shihnim këtë të dilte nga institucionet shqiptare”, thotë Palmer.
Sa i takon shpalljes së ish-kryebashkiakut të Durrësit non-grata në SHBA, Palmer ka theksuar se DASH kishte prova dhe dëshmi të forta në lidhje me aktivitetet e korrupsionit ku ishte i përfshirë Vangjush Dako.
Palmer ka folur edhe për çështje të tjera të Ballkanit, si bisedimet Kosovë-Serbi.