Ish-presidenti i Kosovës, Behgjet Pacolli tha në emisionin Now në Euronews Albania se drafti i propozuar nga kryeministri Edi Rama për asociacionin nuk bëhet kurrsesi për të dëmtuar Kosovën.
Pacolli tha se e përshëndet iniciativën, ndërsa shtoi se është dashur të ketë një bashkëpunim me faktorë të tjerë.
“Veprimin e tij nuk e ka bërë absolutisht me qëllim që të dëmtojë Kosovën apo t’i marrë diçka nga pasuria mendore nga meritat e Kurtit. Ai ka pritur deri tani, Rama di diçka më tepër, se është duke ndodhur diçka dhe para kësaj situate pa se është e mundur dhe ka vepruar”, tha ai
“Se di kush e ka iniciuar, a është konsultuar apo jo me Kurtin, me cilin faktor ndërkombëtar është konsultuara Rama dhe kush është përpiluesi i draftit. Por si iniciativë e përshëndes dhe duke e njohur Ramën, jam i bindur se nuk do bënte asnjë lëvizje që të dëmtonte Kosovën. Kam pasur rastin të punoj Ramën dhe është një njëri që i ka dalë zot Kosovës”, tha Pacolli.
Sipas tij, Kurti asnjëherë nuk ka tentuar të këshillohet me faktorin shoqëror të Kosovës dhe as me faktorin ndërkombëtar.
“Rama do të jetë shumë i kujdesshëm në ruajtjen e interesit të Kosovës dhe Shqipërisë ndaj faktorit ndërkombëtar dhe jam shumë i sigurt se asnjëherë nuk do të bënte diçka në dëm të Kosovës, ky është mendimi im. Kurti asnjëherë nuk ka tentuar të këshillohet më faktorin shoqëror të Kosovës dhe Kurti nuk është konsultuar as me faktorin ndërkombëtar”, tha ai.
“Kjo është punë vetjake e tij. Procesi i Kosovës në këtë proces kanë marrë pjesë shumë shtete miq ndërkombëtar të Kosovës; është çliruar nga pushtuesi, është shpallur pavarësia gjithmonë me mbështetjen e ndërkombëtarëve dhe sidomos SHBA. Ruajtësi i madh i sovranitetit të Kosovës janë SHBA”, tha Pacolli. /Telegrafi/